Gram panchayat 1,500 nung BSNL Optical Fibre Cable inoktsütsü

Guwahati, January 09 (Agencies): Assam nung yimtsüngtem tesentaktep tajungba akümtsü asoshi BSNL ajanga gram panchayat 1,518 nung Optical Fibre Cable (OFC) inoktsütsü sentong lir.
“Yimtsüngtem tesentaktep tajungba akümtsü asoshi tali temelung agütsür aser OFC tasazük kilometre 5,200 nung onoki taküm küm gram panchayat 1,518 nung inoktsütsü aser ibaji ajanga Assam nung gram panchayat noklang nung shilem 70 ayimjemtsü,” ta All India Radio ajanga ayongzükba sentong ka nung jembidang BSNL Chief General Manager, M K Seth-i metetdaktsü.
Kamrup district nung aliba Kshetri Gaon Panchayat ya India linük nung mezüngbuba digital gram panchayat asütsü, ta Seth-i ashi.
BSNL ajanga tongtibang tesemtem nung hot spots 3,000 agutsütsü aser wireless network ajanga automatic hook up asütsü atema sentong tenzükogo, ta paisa shia liasü.
Guwahati nung high-speed network taküm March ita tashi nung inoktsütsü sentong lir.
Demonetisation sülen BSNL-i SBI den longjemer e-wallet ‘Mobicash’ tekeratiba nung tenzüktsü.
March ita tashi nung nübur lakh 1 aser 2022 tashi nung lakh 25-i digital amshitettsü nükjidong lir, ta Assam IT department nung Joint Secretary, Fakaruddin Ahmed-i osang ka metetdakja lir.
“Onoki nisung meyirjang 65 nem digital amshitsü angazükdaktsüogo aser 2022 tashi nung nisung lakh 25 nem angazükdaktsütsü nükjidong lir aser iba atemaji Assam sorkari maparen ajak tenzükogo,” ta paisa metetdakja liasü.
Assam sorkari connection ka ajanga television, internet aser telephone connection agütsüba ajanga nüburtem senotsü nung terenlok angutsü nükjidong nung maparen tenzüka lir.