Grammy Awards New York nung tanaben agütsü tenzüktsü akok

New York, November 30 (Agencies): US nung kententsü sempet agütsüba sentong tongtipangtiba, Grammy Awards sentong US kübok New York nung tanaben agi tenzüktsü atema jembiba osang angazükogo.
“2018 küm nungi tenzüka, Grammy Awards sentong Los Angeles nung masü saka New York nung ang agi tenzüktsü akok,” ta New York Times osangi metetdaktsü.
New York Mayor, Bill de Blasio-i aniba sorkari par yimti nung Grammy Awards sentong agitsü asoshi onük benoka lir saka Los Angeles toktsür New York yimti nung iba sentong agiba ajanga bener arutsüba senotsü khuret indang sentong tayonger, Recording Academy-i tamasa bilemdangba sülen ang New York nem iba maongka agütsütsü mesüra magütsütsü lemtettsü renemba osang angazükgo.
Grammy sempet agütsütsü sentong ya 1959 küm mezüngsüa, Los Angeles yimti kübok Beverly Hilton Hotel aser New York kübok Park Sheraton Hotel na nung kasa mapang nung agia liasü.
Iba mapang nungi tenzüka 2000 küm tashi iba sentong ya Los Angeles aser New York yimti na nung melentepa agia aru.
Ano, temelenshi ka lia, iba sentong ya 2003 kümbo New York yimti kübok Madison Square Garden nung agia liasü.
Tesüsaba, 59 buba Grammy Awards sentong Los Angeles kübok Staples Center nung taruba 2017 küm February ita 12 nü agitsü renema lir.