Grande nem Manchester honorary citizen agütsü

Manchester, July 13, 2017 (Agencies): Kentener, Ariana Grande indang One Love Benefit Concert takok ngua akaba sülen la nem Manchester Honorary Citizenship agütsü.
Tamalen Manchester nung la indang kenten sentong ka nung kiralongrartemi amakdang nisung aika asü, aser iba lendong nung asürtem aser yirurtem yaritsü atema lai One Love Concert ya ayongzüka liasü.
Manchestaer Arena nung kiralongrartemi amakdang nisung 22 asüba sülen anogo 13 nübuba nung lai iba kenten sentong ayongzüka liasü.
Councillors-i vote agütsütepba sülen Grande nem iba maongka agütsür. Ajioda iba yimti nung mezüngbuba honorary citizen ji la asütsü.
Vote agütsüteptsü lia Council lenir, Richard Leese-i, “Lai joko iba tesem kodanga mesemdangner ta ashi nunga, ajaki agizüktetla. Ajisüaka la Manchester-i maru tashi lai kenten sentong nung shilem magitsü melungtet. Ibaji ajanga lai nisung meyirjang aika melung süneptsü, aser lai We Love Manchester Emergency Fund atema sen million aika aazüktsü. Ibayongji Ariana Grande nem Manchester nung mezüngbuba honorary citizen agütsütsü atema ni benoka liasü,” ta metetdaktsü.
June 4, 2017 aonung Old Trafford nung Grande indang One Love concert ajanga Pound sen million 3 ajangzükteta liasü. Iba sentong nungsa lai ayongsema Coldplay, Miley Cyrus aser Katy Perry nungeria shilem agia ken aten.
Kiralongrartemi amakba sülen Grande-i asürtem aser yirua alir kibongtem ajuru aser hospital nunga yirua alir tanurtem ajurua liasü.