Greater Noida lendong sülen Africa kaketshirtemi security meshir

New Delhi, March 28 (Agencies) : Greater Noida nung Hombar aonung atalokbaji ‘hate crime’ lir ta shia Mongulbarnü Africa nunger kaketshirtemi India nung parnok kümzüka ayutsü atema security agütsütsüla ta takhangba agütsüogo.
“Greater Noida nung alirtemi onok Africa nunger melidaktsütsü ta ashi. Iba ya Africa nunger sempaa inyaksangshiba lir. Iba linük nung Africa nunger lendong nung lir” ta Association of African Students President, Samuel Jack-i osangbener dang ashi.
Iba ama lendong ajanga Africa nungeri India nung shisaliok bushitsü atema marutsü akok, ta paisa shisem.
“India nung security timi magütsü tashi ni Africa nunger dang iba linük nung shisaliok bushitsü atema marutsü ayongzüker” ta Samuel-isa metetdaktsü.
Yasüng Africa nunger kaketshirtem dak teka sangshibaji local lanurtemi anir inyakba liasü aser police-i parnok 6 pua lir, ta paisa ashi.
Taoba hopta arishi küm 17 tain tebur ka mozü talila achiba ajanga asü aser yasüng kiyongertemi pa nem tetushi agütsüba sentong ka agidang Nigeria nunger kaketshir pezü dak azük.
Bendangertemi tanubosang pur ao aser mozü chidaktsüba ajanga pa asü ta tanubosang’er tsüraburtemi tai tongloktsür.
Iba lendong nung yirua aliba Nigeria nunger kati ashiba agi, kuli kecha melii pa dak teka sangshi.
“Ni club kechaia maoer. Ni yi majemer. Kuli kecha melii kü dak teka sangshi. Ni kechi anga mashir. Parnoki onok iba linük nung melidaktsünür” ta paisa shisem.
“Centre sorkari mapa inyaktsü aser Uttar Pradesh Chief Minister Yogi Adityanath den jembiogo, Pai bushisüngdang ka asütsü atema tetuyuba agütsütsü nangzükogo.” ta External Affairs Minister Sushma Swaraj-i iba tatalokba atema ashi.