Greece Ato Kilonser, Tsipras-i Turkey linük aitsür

Athens, April 22 (Agencies): Greece Ato Kilonser, Alexis Tsipras-i kidangsüa tentetba Turkey linük aitsüba olen ka tanü, Hokolbar nü metetdaktsüogo.

Refugee nisungtem den sentakba khuret tebongbaba kümdaktsütsü nükjidong nung Aegean Sea nung tenzüker North Atlantic Treaty Organization (NATO) mitkartemi par linük ana arrtsülen duty inyaktsü asoshi tenzükba mapatong nokdangba ken o nung Tsipras-i Turkey aija liasü.

Ozüng alema nisung shibelenertemi refugee nisungtem Greece nung tentetba asetkongtem nungi Turkey-i anir aoba maparen nokdangtsü nükjidong nung NATO-i par mitkar rongtem Aegean Sea anüdoklentip yuja lir saka Turkey-i nokdangba yong Aegean Sea anülulentip tsütsülenibo par rongtem meyoki lir.

“NATO-i Aegean Sea ajunga nung ozüng alema inyakertem nokdangtsü maparen tetsükdakba kecha meli inyakdaktsütsüla,” ta Tsipras-i ashi.

Aegean Sea tsütsülen tentetba linük arrtsü den sentakba mangatettep adokba den külemi, Turkey mitkar tayimtsütemi ozüng alema Greece lushi telung nung yimzüba ken o nung ajemdaker kidangsüa aliba Greece o Turkey linük na tsüngda mapang shia tesendaktep mejungi akümba osang bushiteta lir.

Ano külen, Turkey mitkartemi par tayimtsütem arrtsü adena Greece lushi temalen anüng nung yimzüdaktsüba maparen kodanga magizüktsü lemtetba osang ka Tsipras-isa metetdaktsüogo.