Greece & Eurozone lenirtemi tezüngzüktep tasen ka agiogo

Paris, July 13 (Agencies): Greece aser Eurozone lenirtemi ghonda 17 shi agia senden amenba sülen Greece sorkar nem nungdakba sen aputsütsü melena Greece-ia temelenshi balala agitsü tezüngzüktep tasen ka tanü Hombar nü Brussels yimti nung agiogo.

Ajisüaka, Greece aser tanüngba eurozone züngsem 18 na tsüngda agiba tezüngzüktepji mapa küma inyaktsü asoshi Greece Ato Kilonser, Alexis Tsipras-i par Greece ajungai sen tajemba aser taoba mapang dang nungi tekümdangba amshitsü onük par parliament nem tan Bodbar nü tashi nung agizükdaktsütsüla.

Kasa onükji mapa küma inyaktsü asoshi Greece nüburtem nema agizükdaktsütsü mapa anünga lir.

Ajisüaka, Greece nüburtemi taoba hopta ang iba onükji magizüktsü ta vote agüja metetdakja aliba yong Tsipras-i khuret tulu ajurutsü akok ta mongintemi metetdaktsüogo.

Tan Greece aser eurozone na tsüngda tesendaktep tasenba agiba ajanga Greece-i maneni eurozone nung züngsemtsü temetena angur lir.

“Eurozone-i Greece sorkar nem nungdakba sen aputsütsü tezüngzüktep agiogo. Greece-ia nungdakba temelenshi agitsü nangzükogo,” ta European Council Tir, Donald Tusk-i tanü metetdaktsü.

“Ozü Greece indang rongsenren jenjang mejirepdaktsütsü nükjidong nung eurozone nungi nungdakba sen aputsü tezüngzüktep tan agishiogo. Ajisüaka, ozü Greece nung terenlok lidakja ozü rongsenren jenjang tajungba kümdaktsütsü nangzüker,” ta Tsipras-ia tanü metetdaktsü.

Greece-i maneni eurozone nung züngsemtsüsa tezüngzüktep agiba atema pelar ta shia, Greece-i temelenshi agitsü den sentakba onüktem benoka eurozone züngsemtemi maneni senden amentsü renemba osang ka France Tir, Francois Hollande-ia metetdaktsü.

Greece aser eurozone nati tezüngzüktep tasen agishiba osang angazükba sülen Europe nung tentetba stock shishilembadak balala nung Euro sen jenjang temaleni atuba osanga jangjaogo.