Greece-i Olympic Games asayadak migrant nisungtem jenokdaktsür

Greece yimtiba, Athens kübok Victoria Square nung jenoka alir refugee tila tanurtemi Galatsi Olympic Hall-i aotsü asoshi terenemshiba tanü Hokolbar nü agiba noksa nung angur. (Athens, October 01)

Athens, October 01 (Agencies): Greece sorkari par yimtiba, Athens kübok Victoria Square nung jenoka alir migrant nisung 400 dak tema taoba mapang Olympic Games asayadak jenokdaktsüogo.

Pei linük toktsür Europe nung jenokertem talisa, Syria aser Afghanistan nunger timba densemba refugee nisungtemji police-i bus gari ishika nung anioker Galatsi Olympic Hall tanü Brehostibar nü tonga anir aoba osang jangjaogo.

Galatsi Olympic Hall ya taoba mapang, 2004 Olympics nung table tennis aser gymnastics toktepa asayaa liasü.

Europe-i tang ajurushia aliba migrant nisungtem den sentakba khuret tulu Greece sorkaria tang benoka lir aser par nüburtemi tebilemtsü khuret benoka ajiteta Athens yimti sorkari tanü yimdong nung jenoka alir migrant nisungtemji Olympic asayadak jagi anir ao.

Ano külen, alima ajungai Europe-i tang ajurua aliba refugee khuret bentettsütsü asoshi nungdakba maparen inyaktsü tajungshiba olen ka United Nations (UN) Secretary General, Ban Ki-moon-ia yashi UN senden nung metetdaktsüogo.

“Tarutsü mapangji pei lushi atsübangertem meyong masü,” ta shia, Europe-i tang inyakba den tali bendanga agüja inyakba ajanga dang refugee khuretji bentettettsü ta Ban-i ashi.

Ano, refugee khuret adoktsüdak, Syria aser Afghanistan na nung tongpang kanga sashia raraa tensa mejungi kümdaktsübaren azüoka kasaji agientsü asoshi Ban-i alima lenirtem ajungshia liasü.

Gulf lima tentetba linüktem aser alima nung terenlok tulu ngua aliba linüktemi tang ajurushia aliba refugee khuret nung yariteptsü asoshi dollar sen billion 1.8 tashi UN nem agütsütsü tenangzükba ka metetdaktsüogo.

Japan linüka dollar sen million 810 tashi agüja UN den yariteptsü asoshi nangzüka liasü.

Taküm January ita nungi tenzüka tanü tashi nung Middle East aser Africa nung alir refugee nisung 515,000 shii Greece aser Italy na ajanga Europe tonga aoba osang bushiteta lir ta UN-ia metetdaktsüogo.