Greece-i Pension & Tax den sentakba temelenshi agitsü nangzüker

Greece Ato Kilonser, Alexi Tsipras-i tanü Bodbar nü France kübok Strasbourg nung amenba European Parliament senden nung o jembia shilem agiba noksa nung angur. (Strasbourg, July 08)

Athens, July 08 (Agencies): Greece-i taruba hopta nungi tenzüka pension aser tax den sentakba temelenshi agitsü tenangzükba ka tanü Bodbar nü metetdaktsüogo.

Par linüki tang ajurushia aliba rongsenren timtem melenshija jenjang tajungba küma ajungkettsütsü asoshi eurozone-i Greece nem taruba küm 3 tashi sen aputsütsü nangzükba melena par linükia iba temelenshitsüji agitsü renema lir ta Greece foreign ministry-i tanü metetdaktsü.

“Ozü linük indang rongsenren jenjang tajungba kümdaktsütsü asoshi European Stability Mechanism (ESM)-i dang melungra, ozü linükia saru saji aser pension agütsütsüren den sentakba temelenshi taruba hopta nungi tenzüka mapa küma inyaktsü nangzüker,” ta ministry-i tezüluba nung metetdaktsü.

Par linük nem nungdakba sen aputsür, eurozone telok den tesendaktep tajungba yua par Greece-i tango sashitetsüsa tia bener arutsütsü nükjidong nung Greece Finance Minister tasenba, Euclid Tsakalotos-i iba shiti nung pai maitsü enoksemba osanga jangjaogo.

Europe-i amshiba sen, Euro jenjang meraksadaktsütsü nükjidong nung ESM-i Greece nem nungdakba sen aputsütsü lemtetba osanga jangjaogo.

“Ozü linük indang rongsenren jenjang tajungba kümdaktsütsü aser ozü linük nem sen apuja yarir den agiba tenangzüktepba ajunga asangsang nung atalokdaktsütsü alizüng tulu yua lir,” ta Tsakalotos-i shiti ajanga metetdaktsüogo.

Ajisüaka, Greece nüburtemi sen tajemba aser tali kümdanga amshitsü onük magizüker ta taoba Deobar nü metetdakja aliba yong Greece sorkari tan agiba tenangzükbaren takok ngua agitsüji kanga dang tasak asütsü ta mongintemia metedaktsüogo.

Ano külen, mapang matong dang anojungi sorkar mapa nungi anentsü lemtetbaren nokdangtsü densema pension agütsütsüren ajemtsütsü asü par linük nung shishilembatsü saruji ESM-i akhangba ama noklang nung shilem 23 küma temaba jenjang nung ajungkettsütsü tebilemba lir iba osangji tanü benokba shiti nung memetetdaktsüba osang jangjaogo.

Ano, par Ato Kilonser, Alexis Tsipras-i nangzüka ama, par Greece-i temelenshi agitsü den sentakba mapatong tejangja eurozone den tan Brehostibar nü tashi nung benoktsü tenangzükba ka Tsakalotos-i metetdaktsüogo.

“Ozü linük nem sen apuja yarir dang nangzükba ama, mapatong ajunga mapang shitak nung inyaktsü nangzükshir,” ta pai ashi.

Greece-i tang rongsenren tia tamajung ajurushia lir aser par linük indang rongsenren jenjangji tajungba küma memelenshitetra, par linüki eurozone nunga mezüngsemtettsüsa akümtsüsüa tang tia lir.