Greece’er rongsenren jenjang tajungba kümdaktsütsü: Tsipras

Athens, September 25 (Agencies): Tang kanga dang tepetzük jenjang nung aliba Greece linük indang rongsenren jenjang tarutsü mapang, 2019 küm tashi nung tajungba kümdaktsütsü nükjidong nung Greece Ato Kilonser tasenba, Alexis Tsipras-i par linük nem sen apuja alirtem den tangatetep kati arutsü tenangzükba olen ka tanü Hokolbar nü metetdaktsüogo.
“Asen linük nem nungdakba sen apuja Greece nungitba Eurozone telok den taruba küm 4 tsüngda nung tangatettep kati arua asen linük indang rongsenren jenjang tajungba kümdaktsütsü nangzüker,” ta sorkar tasenba tenteter tanü mezüngsüa amenba Cabinet senden nung Tsipras-i metetdaktsü.
Greece-i tang rongdaka nungdakbaji par linüki benoka aliba sentsü khuret agientsü aser par linük indang banking jenjang tajungba kümdaktsütsüji lir ta pai shisem.
Taoba Deobar nü agiba election nung takok anguba sülen arishi küm 41 tain Tsipras-i teloktep sorkar tasen ka tang tenteta lir.