Greek Football League mapang telatet ka makai anentsüogo

Metsüremi 13, 2018 (Agencies): Greece nunger football asayamung rongnung tematiba, mapang telatet ka makai anentsüogo, ta Minister kati ashi. Iba telemtetba ya PAOK team kiburi prangbong ka pa indang belt nung meleper ground telungi aiba sülen ghonda ishika lir agi.
Greek Ato Kilonser Alexis Tsipras-i ashiba agi, linük nung asaya tem rongnung tematiba, football koba ajanga mapangshia timtem agütsür iba asaya atema ozüng tesashi benoktsü asoshi pai mulungteter lir.
Tsipras den ajungben senden ka akaba sülen deputy minister for sport, Yiorgos Vassiliadis-i osangbenertem dang ashiba agi, telok ajaki mulungtepa inyakyim tasen ka mebenok tashi Superleague championship ya metenzüktsü.
Vassiliadis-i ashiba agi, sorkari European football body UEFA den tongtepratepdar aser parnoka iba osang angashia aoksa liasü.
Police-i PAOK kibur Ivan Savvidis aputsüba atema tetuyuba agütsüogo, shiba Amungnü pa body guard tem den külemi ground telungi referee den asateptsüba atema ia liasü. Asaya minute 90 buba nung referee-i goal ka magütsüba sülen iba ya atalok. Iba asaya ya AEK Athens den PAOK pur temaba jenjang atema asaya ka liasü.
PAOK sports director aser taoba mapang Slovak nunger FIFA referee, Lubos Michel-ia referee Yiorgos Kominis amokmerenogo, ta bilemer.
Iba asaya nung AEK pur asayartem ground toktsür aoba sülen asaya khen atema anena liasü. Goal koba ajanga mangatettep adok, iba goal ya agia liasü.
Vassiliadis-i ashiba agi, sorkari Greek football asüngtettsü asoshi küm asem tashi raraa aruogo aser tang ibala tatalokba ajanga iba mapa ya amajok mekümdaktsütsü.
“Onok federation aser league nungi osang atadar. Inyakyim tesashi ka nüngdaker,” ta paisa ashi.
Paisa, iba timtem ajanga taruba season nung Greek nunger club tem European club asaya nung shilem magitettsü akok, ta ashi saka iba ajanga National team dakbo mekongshitsü, ta shisem.