Green Team Kohima-i ‘Alternative to Plastic’ training ka ayonga agi

Kohima, March 30 (TYO): Tanü Khonoma village nung Green Team Kohima-i Khonoma Students Union den senpeter ayongzükba “Alternative to Plastic” training nung nisung 55-i shilem agia denogo, ta ketdangsertem osang ka ajanga metetdaktsü.
Anogo ka piyong skill training nung shidi aser sü agi yangkhu yaluba tesayuba agütsü; iba ya plastic bag amshiba nokdangtsü nükjidong nung ayongba training ka liasü. Green Team Kohima nung Kohima Municipal Council, Kohima Chamber of Commerce & Industries, Coming Generation, Yard, Project 72 hours, Earth Friendly Generation aser lipoküm atema lenla balala nung inyakertem liasü.
Iba sentong nung o tatsüka jembidang KCCI General Secretary, Akhrie Mor-i state sorkari plastic nokdangtsü atema nendaka inyakba atema tenüngsang agütsü.
Laisa kaketshirtem aser lokti tentet balala nung shilem agir tetsürtem dang plastic amshiba ajanga temang nung timtem agütsüba aser tzü-mopung menentsüba indang rajema alitsü, aser plactic nokdangtsü atema renema alitsü ayongzük.
Chief Administrator, The Coming Generation, Francis Ruangmei-i, plastics nung chemical keta lir aser temang den tzü-mopung atema lendong keta lir, ta ashi.
Plastic nung Bisphenol A nung keta lir, koba ajanga cancer adokdaktsür, tanur agitsü nung timtem agütsür aser hormones raksatsür, ta pai ashi.
Khonoma Students Union president, Kelhu-i lokti pela agizükba o jembiba iba sentong tenzüka liasü.