Greenland Nagaland-i green vehicle sayaogo

Dimapur, September 27, 2024 (TYO): World Tourism Day den külemi Greenland Nagaland-i Hokolbarnü Circuit House Dimapur nung air conditioned green gari sayaogo.

Nisung 14 amenba green electric gari nung GPS aser PA systems enoka lir aser Northeast nung tang mezüng atema tourists anishitsü atema iba gari sayaogo.

“Greenland Nagaland teloki iba gari sayaa Green movement tenzükba atema tenüngsang agütsür” ta Food & Civil Supply, Legal Metrology & Consumer Protection Advisor K.T. Sukhalu-i ashi.

“Tanga state tem den medemdangra Nagaland nung pollution levels tajemba lir saka tangalen nungi gari tamajungtem bener arua amshitepba ajanga mopung menentsür. Greenland Nagaland-i tanga district tem nung tesentaktep yur lipoküm wazüka ayutsü mapatem inyak junger” ta pai ashi.

“State sorkari Chief Minister menden ser luden ka tentetogo aser iba luden ajanga lipoküm wazüka ayutsü lenmangtem bushir. Investment and Development Authority of Nagaland (IDAN)-i Hornbill Festival nung tourist anir senzütsü atema bus garitem alitsü shidanga lir. Anungji Greenland Nagaland-i Tourism department den yaritepa green buses saya nung ajungtsü” ta Sukhalu-isa ashi.

“Nagaland nung Tourism renloka arudar aser talisa Kohima, Wokha o Dimapur nung tourism jenjang ajungketer. Sorkari Tourism Department den külemi tourist guides jungjunga arangshitsü aser ainertem nem facility tajungba agütsütsü meranger. Tanü lanurtem ya asüng lennirtem asütsü aser iba jagi lanurtemi Tourism maparen nung shilem agitsüla” ta paisa ashi.

“Nagaland nung alirtemi iba maparen nung shilem agitsüla aser sorkari yimjung, azükaru aser nübortem tiptema aliba atema inyakba nung pusema nungittsü ayongzüker. Greenland Nagaland-i tanga district tem nunga mapa inyaka aotsü ajungshir” ta Advisor Sukhalu-i ashi.

“Nagaland nung Green Projects inyaktsü lenmang sadema lir aser iba atema inyaka arudang nisung aikati ni yariogo aser Greenland Nagaland ya Mission & Movement ka kümdaktsüogo” ta Greenland Nagaland secretary, Dr. Swaraj Mukherjee-i ashi.

Hornbill festival matongdang Green Mobility Project ajanga Nagaland kübok district 16 nung iba mesükba Green EVs sayatsü aser ano aika inyaktsü ta pai ashi.

“Nagaland nung Green Culture nüngdaker aser entrepreneurs-i iba mapa ajanga sen aika aazüktsü lenmang lir” ta Greenland Nagaland president Dr. Longri Jamir-ia ashi.

Iba sentong nung Greenland Nagaland Treasurer Dr. Maongwati Aier-ia Greenland Nagaland indang nükjidong kar lemsatepa liasü.