Grenfell Tower mi lendong ya fridge nungi adok: Police

London, June 23 (Agencies): June ita tetenzüklen London nung nisung aliba ki tulu ka mi adoka arongdang nisung 79 asü aser iba lendong ya fridge-freezer nungi adok aser iba ki tema nung inoka aliba ‘cladding’ ajanga iba mi nungi mekümzüktet, ta police ajanga ashi.
1974 küm yangluba Grenfell Tower nung storey 24 aliba ya June 14 anepdang mi adoka arong aser iba lendong nung nisung 79 ya asü mesüra sama, ta police temi ashir.
“Iba mi ya ajungbena adokba masü ta mongin temi bushitetogo. Aser iba ki yanglushiba nung shilem agiba company tem bushisüngdang südagi,” ta Detective Superintendent, Fiona McCormack-i ashi.
Iba ki temalen inokba cladding aser tiles tem ajanga mi nungi kümzüktsü asoshi tendangba nung tamakok alu, ta McCormack-isa ashi.
Iba ki yanglushiba mapa taoba küm ang tembang aser iba mapang cladding ya inok.
Iba ki nung mi jangruba ajanga England nung iba amala cladding inoka yanglua aliba tower 600 dak tali nung bushisüngdang aser maparen balala tendangba mapang lir.
Iba lendong nung asür ya tejangja memetet aser iba ki nung alirtem dang iba kuli tejangja metettsü asoshi asüngdangba mapang ka lir, saka tejangja monguteter, ta lai ashi.
Iba lendong nung asür ya anu alitsü südi, kechiyong iba tower nung ozüng alema alir nisung aika liasü, ta police temi ashir.
“Iba ki nung forensic amshia bushiba ya taküm küm metemtettsü südi,” ta McCormack-isa shisem.
Ozüng alema arua alirtem süaka parnoki nüngdakba teyari agütsütsü, ta Ato Kelonser, Theresa May-i Brehostibarnü metetdaktsü.