Grenfell Tower teyari atema One Direction lungjemtsü

London, June 18 (Agencies): Teburtem kentener telok, One Direction nung züngsem ajunga pei kija ken yanglua atemba mapang ka lir, saka iba telok ya mapang talangka melei lungjemtsü ama osang ka aruogo.
London nung aliba Grenfell Tower mi lendong ajurua aliba nüburtem nem teyari agütsütsü mechi iba telok ya lungjema kenten sentong nung shilem agitsü maparen balala inyaktepba mapang lir, ta osang ajanga ashir.
Iba sentong nung shilem agitsü asoshi One Direction züngsem, Liam Payne aser Louis Tomlinson nati molungogo aser iba sentong nung shilem agitsü asoshi Niall Horan aser Harry Styles-na sentong balala yanglua alibatem reprangshiba mapang ka lir.
Simon Cowell-i jembiba sülen nüngtugu kentener Rita Ora, Robbie Williams, Louisa Johnson, James Arthur, Emeli Sande, Craig David aser 60s mapang kentener nüngtugu telok, The Who nunger temi iba sentong nung shilem agitsü molungogo.
West London nung aliba Grenfell Tower nung 2017, June 14 anogo mi adoka rongdokba lendong mapang iba ki nung alir nisung 17 asü aser aika chiyongtsü, talidak ki aser abensüoshi agi anünga kümogo. Aser item nisungtem nem teyari agütsütsü atema senotsü bendentsü nükjidong nung kentenertem adenshia ken ka tentsütsü asoshi iba ki anasa alisang, arishi küm 57 tain, Simon Cowell-i kentener aika den osang agitepba mapang lir.
“Iba ken ya Hombarnü tashi nung record süa renemtettsü imlar. Nisung aikati iba ken atenba nung shilem agütsü molunga aliba onok dang shiogo. Iba sentong ajanga temelenshi bener arutsü ni imlar,” ta Simon Cowell-i ashi.
Iba lendong nung nisung noklang aika talitsü ki rongdoker alir nem teyari kicha magütsütetra, ‘X Factor’ nung tetendanger, Simon Cowell, shiba Lauren Silverman den arishi küm asen tain jabaso Eric lir, pa temolung mesangwatsü aser ajem ajema melitettsü, ta ashir.
Iba kenten sentong nung shilem agitsüpurtem ya Simon Cowell indang label, Syco nung alirtem, Little Mix, Camila Cabello, Labrinth aser Noah Cyrus nungertema lir.