Grinder Muivah temulungjang tashidak agi süogo

Dimapur, April 06 (TYO) : Tanü Bodhbarnü Delhi nung Grinder Muivah temulungjang tashidak agi ajungbena asüba osang angashia NSCN-i temulung kanga nemjema bilemer, ta NSCN-i sangdong ka ajanga metetdaktsü. Pa arishi küm 57 liasü.
Grinder Muivah ya Ukhrul district nung aliba Somdal yimtak Naga linük atema kanga bendanga agüja inyaker kibong ka nung aso.
Kinungtsü den jabaso asem aser jala ka ta toktsür pa iba lima nungi pilaogo.
1995 küm India sorkari Indo-Naga yimten ken o jembiba nung pa tongteprateper ka ama südaktsütsü benok aser ibaji NSCN-i kanga pelashishia agizük.
Iba sülen pai Indo-Naga tebilemtsü nung tangatettep tajung ka bener arutsü atema kanga bendanga agüja aser meranga inyak meso.
Tang asenoki pa nübu kanga nüngdakba mapang ka nung pai asenok toktsür aoba ya mamangteter. Pa asüba ajanga yimtem tebilemtsü nung ongdang tulu ka adokogo aser ibaji kecha agia memesemtettsü, ta NSCN-i ashi.
Naga linük atema mapa tajung jenti inyakteta yutsüba atema onoki asür nem konang aser tetushi tulu agütsür, ta sangdong ajanga ashi.
Pa süaka teti bilemtettsü aser Tsüngremi pa tanela anisüngzükdaktsüba den pai toktsür aoba kinungertem mangyim jashi mapang tesüneptsüba agüjangma, ta NSCN-i sangdong ajangasa ashi.
Shishilemba mapa kanga takok ngua inyaktetsang, Grinder Muivah April 06, 2016 nü New Delhi nung iba lima nungi pilaba osang angashia temulung kanga raksar, ta Naga Hoho nung Tongti tezülur Mutsikhoyo Yhobu-i sangdong ka ajanga metetdaktsü.
Pai, “Asür Grinder Muivah ya shishilembaba mapa nung kanga nendaka aser bendanga agüja inyaker nisung ka aser Naga lokti atema inyaker Naga lenir tajung rongnung ka liasü. Pai Naga nunger atema inyakteta yutsüba mapa tajungtem teti bilemtettsü,” ta ashi.
Pa asüba ajanga asen tetsü tasoli meyong chichiba lenir tajung ka mali akümer. Onoki pa tanela süngjema anisüngzüktsü Tsüngrem dang sarasademtsür. Iba den külemi tang ama shisabulu mapang nung pai anünga yutsüba kibong nema Tsüngremi anisüngzük aser tesünep yokang ta onoki sarasademtsür, ta kasa sangdong ajanga Naga Hoho leniri ashi.