Gruevski-i Macedonia Ato Kilonser menden toktsütsü sangdonger

Skopje, January 15 (Agencies): Macedonia Ato Kilonser, Nikola Gruevski-i par linük election agiba jakdang yimsüsütsümenden toktsütsü lemtetba osang ka tanü Hokolbar nü sangoktsüogo.

Macedonia-i taküm April ita 24 nü election agia sorkar tentettsü sentong renema lir aser iba maparen sadema inyakdaktsütsü tangatetba nung Gruevski-i Ato Kilonser menden toktsütsü osangji tanü yimjak nung sangoktsü.

Guevski-i  Ato Kilonser menden toktsür par VMRO-DPMNE yimtenren telok nungi yimsüsür ka nem yimsüsütsü mendenji sorkar tasenba metentet tashi bendaktsütsü lemtetba osang metetdaktsüogo.

European Union (EU) aser US nati ayonga, Gruevski-i election agitsü anogo 100 anünga lia Ato Kilonser menden toktsütsü tezüngzüktep ka Macedonia’er tongti opposition telok, Social-Democrat den yaküm, 2014 July ita agia lir.

Yaküm agiba tezüngzüktep mapa küma inyakdaktsütsü nükjidong nung EU enlargement commissioner, Johannes Hahn-ia tanü Macedonia tonga ao Gruevski aser opposition lenirtem den ajurutepa senden amenba osang jangjaogo.

Ajisüaka, taoba küm 10 shi Macedonia madak yimsü asüsang, Gruevski-i tan sangoktsüba ama asangsang nung yimsüsütsü mendenji toktsütsü asü metoktsütsü iba osang tang tashi mejangjateti lir.

“Yaküm renemba ama electoral roll tasen küma yanglushitsü aser osangtsüsang belenshitsü maparen melenshi densema, ochishia election agitsü mapatong jenti ano mapa küma meinyaki lir,” ta shia, opposition lenisang, Zoran Zaev-i April ita agitsü ayongba election anogoji melenshitsü onük benoka lir.

Ajisüaka, election agitsü anogoji thinenra, yaküm agiba tezüngzüktep agientsü aser Gruevski-i Ato Kilonser mendenmetoktsütsü renemba osang ka VMRO-DPMNE teloki metetdaktsüogo.