GST ajanga jenjang atutsü: P Chidambaram

Karaikudi (Tamil Nadu), July 01 (Agencies): Honibarnü Congress lenir tain aser UPA sorkar mapang Union Finance Minister, P. Chidambaram-i, tang benokba Goods and Services Tax (GST) inyakyim ajangabo sensakertem nem khuret agütsütsü aser tilateri shishilembartemi timtem ajurutsü, ta metetdaktsü.
Tamil Nadu, Karaikudi nung osangbenertem senden ka nung jembidang Chidambaram-i, GST nung anti-profiteering ozüng ajanga nüburi ketdangsertem matsüngdang timtem ajurutsü, ta metetdaktsü.
Chidambaram-isa, “Goods aser service shilem 80 nung saru alitsü aser jenjang timba akumtsü. Osettsüset nung jenjang atutsü. Iba atemaji sorkari kechi inyaktsü?” ta asüngdang.
Pai ashiba agi tilateri shishilembartem aser entrepreneur tem kanga kongshitsü, kechiyong ozüng tasenba mapa küma inyaktsü atema parnok renema mali.
“Parnoki mapang tali meshia liasü, ajisüaka parnok nem mapang magütsü,” ta Congress lenirisa ashi.
Shishilembartem junga renema maliba agi parnoki ano mapang tali meshia liasü, saka sorkari GST ya aritepa benok, ajisüaka ozüng tasenba ajanga kongshibatemji tesülen ang metettsü, ta paisa ashi.
“Iba ya Congress-i aginüba GST aser mongintemi asalentong yangluba GST masü. Iba ama ozüng den tamajungba kecha malitsü,” ta pai aitsü.
Chidambaram-isa agi, UPA sorkari iba ozüng (GST) atema junga renema liasü, saka iba mapang nungji BJP-i kanga anema nokdak. Tang aliba kasa BJP-i parnok opposition nung alidang GST anema sashia nokdak. Ibaji shingia, nunga, ta meshitettsü,” ta Chidambaram-isa metetdaktsü.
Taoba Union Finance minister-isa, tang tashi shishilembartemi parnok koba GST küboki aiter mesüra Centre asü state-i parnok dang saru agitsüar memetet, ta ashi.
“Shilem 90 CGST kübok asütsü aser shilem 10 SGST kübok asütsü. Karaikudi nung shishilembar kati pai Centre sorkar ketdangsertem asü state sorkar ketdangsertem nem saru agütsütsüar mejangjar,” ta paisa shisem.
Chidambaram-i, tang benokba GST ya tashioktsüba ka lir, aser iba inyakyim ya market economics mangatetertemi yanglu, ta aitsü.