GST ajanga Nagaland kanga ajangzükogo: TR Zeliang

Dimapur, October 25, 2024 (TYO): Goods and Services Tax (GST) mapa inyakba ajanga Nagaland kanga ajangzükogo aser tesüiba dang nungi sales tax revenue kanga agi tajungba kümogo ta Deputy Chief Minister T R Zeliang-i ashi.

“GST ajanga India nung indirect taxation system nung temelenshi tulu bentsür aruogo. Nagaland-i Centre dang nungi Tax devolution aser post-devolution revenue deficit grants anguba ya tax nungi lir aser iba ajanga state ketdangsüba nung teyari tulu angur” ta TR Zeliang-i ashi.

Hokolbarnü Niathu Resort nung GST Refresher Training cum Stakeholder’s Meet 2024 nung pai iba onük jembi.

Iba sentong ya State Taxes department-i GST Network (GSTN), New Delhi den yaritepa ayongzük.

Tax ketdangsürtem nem training agütsüba den ano sendaktepa alirtemi GST maparen tali angatettsü aser iba sülen anidaktsü ayongzüktsü atema iba sentong agiogo.

Nagaland State Tax department-i Aadhaar based biometric authentication tenzükba atema tenüngsang agütsü. North Eastern state tem rongnung iba inyakyim tenzüker mezüngpur rongnung Nagaland dena lir aser iba ajanga fake registration noktanger, ta TR Zeliang-isa ashi.

“Nagaland sorkari GST system nung adentsüpur ajak anioktsü meranger. Tax ketdangsürtem kanga kümdanga alitsüla aser tax administration shitak inyaktsüla” ta paisa ashi.