GST ajanga rongsenkettsüng jenjang ajungkettsü: Pankaj Kumar

Kohima, April 29 (TYO): Nagaland nung Goods and Services Tax (GST) benokba ajanga tajangzük angutsü kechiyong saru balala ajak ka küma lokteptsü, ta Nagaland Chief Secretary Pankaj Kumar-i tanü ashi.
Alima nung rongsenren tsütsü India jenjang tasembuba nung lir, ajisüaka asen linük nung technology peria maliba ajanga asenoki tanga linüktem memeneper. GST ajanga asen linük aser state rongsenren tsütsü tejakleni aotsü imlar, ta Pankaj Kumar-isa shisem.
GST benokba ajanga Central Sales Tax (CST) densema sales taxes kanga tezüpa akümtsü, ta GST awareness campaign nung jembidang Nagaland Chief Secretary-i metetdaktsü.
Iba sentong ya tanü Central Excise, Custom & Service Tax aser Nagaland Taxes Department tem külemi APO Hall Kohima nung ayongzüka agi.
Nagaland ya alizüka agiba state ka lir aser GST ajanga asenok mesükba state tem kanga ajangzüktsü, kechiyong direct benefit transfer ajanga asen state atema saru lemzükbaji indangindanga asen senpongi aittsü, ta Pankaj-isa metetdaktsü.
State nung tang teinyakdak saru dak sendakba inyakyim ya GST ajanga tajungba kümdaktsütsü aser iba ya ajanga state nung temelenshi tulu adoktsü, ta paisa shisem.
Sentong nung Chief Commissioner, Central Excise, Custom & Service Tax, Shilling Zone, SK Panda-ia o jembidang, GST saru agütsürtemi tesem aika nung saru agütsütsü melena saru ka dang agütsütsü, ta ashi.
GST ya angatettsü asoshi kanga dang tezüpa lir, anungji saru agütsürtemi tangar teyari balaka menüngdaktsü. GST indang inyakyimji internet nung amendaker inyaktsü anungji iba nung tim masüba mapa meinyaktettsü aser GST Network ajanga saru dak sendakba mapa ajak inyaktettsü, ta SK Panda-isa metetdaktsü.
Commissioner of Taxes, Nagaland, Asangba Chuba Ao-ia GST nung tajangzük keta alibatem metetdaktsüdang, “iba ya ajanga saru onsara saruba aser kechisarena ajak nung jenjang ajema kümdaktsütsü,” ta ashi.
Iba sentong nung shishilembar, contractor, hotel kibur aser tangartem aika arua aden.