GST aser demonetization ajanga kongshiba süiogo: Arun Jaitley

Washington/New Delhi, October 13 (Agencies): Tanü Union Finance Minister, Arun Jaitley-i, demonetisation benokba aser GST inyakyim benokba ajanga India rongsenkettsüng nung kongshiba mapang süiogo, aser joko rongsenkettsüng jenjang ainba tenzüktsü, ta metetdaktsü.
Tang Jaitley-i US semdanga lir, aser tanü Washington nung Federation of Indian Chambers of Commerce and Industry (Ficci)-i ayongzükba ‘India Opportunity’ seminar nung jembidang pai, “Sorkari inyakyim melenshia benokba ajanga India rongsenkettsüng tashi itta aintsü. Demonetisation aser GST ajanga rongsenkettsüng jenjang kongshiba mapang süiogo,” ta ashi.
Paisa, “Demonesitation telemtetba sülen July 1, 2017 nungi Goods and Services Tax benoka temelenshi kadar. Sorkari inyakyim melenshiba ajanga rongsenkettsüng aintsü,” ta ashi.
International Monetary Fund (IMF) aser World Bank densema senden balala nung adentsü atema Jaitley-i hopta ka atema Washington D.C. semdanga lir. Pa den Reserve Bank of India (RBI) Governor, Urjit Patel aser Economic Affairs Secretary, Subhash Chandra Garg na densema ao.
Paisa, India nung 2015-16 küm dang nungi 2016-17 küm foreign direct investment (FDI) timba kümogo, aser ibaji ajanga alimai India rongsenkettsüng nung temelung lemtetba temaitsü sayur, ta metetdaktsü.
Kasa sentong nung Union Minister-i, alima aser India rongsenkettsüng, national investments aser sorkar indang Infrastructure Fund aser reform initiatives metetdakja liasü.