GST atema Jaitley-i yimtenren party ajak dang pelaba lemsatep

New Delhi, June 08 (Agencies): Yimtenren party ajaki amalitepa inyakba ajanga Goods & Services Tax (GST) Parliament nung agizüka takok ngutetba atema Brihostibarnü Union Finance Minister, Arun Jaitley-i party ajak dang pelaba osang lemsatepogo.
Yimtenren party ajak nungi Tirtem dangi züluba shidi nung Jaitley-i, “Yimtenren party ajaki amalitepa inyakba ajanga Parliament nung 101buba Constitutional Amendment Act, Goods and Services Tax (GST) agizüktet, aser kasaji 2016 September 8 nü sangdonga liasü,” ta ashi.
Paisa, Parliament nung ozüng asem- GST, Integrated GST aser Union Territories GST agizükogo, aser state 25 nung State GST law agizükogo, ta metetdaktsü.
Jaitley-isa, tesüiba ita 8 tsüngda GST Council senden 15 ben menogo aser iba mapang nung draft ozüngtem agizük aser osettsüset ajak nung GST rates latet, ta metetdaktsü.
Linük nüchiso anguba sülen saru inyakyim nung tongtibangtibaji GST lir aser iba ya ajanga linük nung shishilembaba aser saruyim temelaba akümtsü, koba ajanga investment ajungkettsütsü aser GDP aintsü.
Jaitley-isa, GST ajanga saru ka dang akumtsü aser ibaji ajanga sensakertem anisüngzük angutsü, kechiyong osettsüset ajak, talisa nüngdakba osettsüsettem nung jenjang ajema akumtsü, ta metetdaktsü.
MP tem aser MLA temi saru ozüng tasenba, GST indang rajema alitsü, aser ibaji nüburtem nem metetdaktsütsü nüngdak, ta shia Union Minister-isa, “Linük nüburtem dang GST ozüng rateta ashitsü atema parnoki (MP & MLA tem) ozüng tasenba indang tongtibang onüktem angateta alitsüji kanga tongtibang,” ta ashi.
“Iba ozüng benoka inyakba mapang shishilembaba aser Industry-i timtem kar ajurura lenirtemi ibaji angatetdaktsütsü atema training junga agir renema alitsüla,” ta paisa shisem.
Jaitley-isa yimtenren party balala nungi Tirtem dang MP aser MLA tem atema GST indang workshops aser training ayongzüka kadaktsüner, ta mepishia metetdaktsüogo.