GST bill ajanga ajak ajangzüktsü: Jaitley

New Delhi, March 29 (Agencies): Bodhbarnü Union Finance Minister, Arun Jaitley-i Goods and Service Tax (GST) kübok bill pezüprongla Lok Sabha nung benok, iba sülen iba bill agizüktsü atema ghonda tenet ser tesadang o toktep tenzüka liasü.
Finance minister-i, tatembangbuba telemtetba ka magidang party ajaki telemtetba ka dangi arutsüji tongtibang, aser ibaji ajanga item bill agizükba sülen tashishitep madoktsü, ta metetdaktsü.
“Tebilemba onüktem benokba nung ajemdaker telemtetba ka dangi arutsü atema GST council senden 12 ben menogo,” ta paisa ashi.
Item bill dak sentakba nung Jaitley-i, item bill ajanga temelenshi adoktsü aser saru magütsüba tebilemtsü koktettsü, ta ashi.
July 1 nungi tenzüka GST mapa küma benoktsü atema sorkari meranga inyakogo, aser iba bill ajanga ajak ajangzüktsü, ta minister-i ashi.
Tang tagitak senden nung GST bill ya ajaki melunga agizüktsü ta Jaitley-i imlaa liasü, ajisüaka Congress MP, Veerappa Moily-i GST nung anti-profiteering clause aitsü.
Moily-i, “GST nung anti-profiteering clause ya ozüng kanga tesashi,” ta ashi.
Mapang mapangshia sorkari GST bill tem ya tongtibang ta jembia arur, ajisüaka opposition tsütsü melung masübatem lir.
GST dak sentakba ozüngtem nung party ajak telemtetba tajung ka dangi arutsü atema Jaitley-i kanga meranga inyaka aruogo.