GST Bill ji agizüktsü: Union Forest Minister Javadeker

Lucknow, August 14 (Agencies): Tan mongpu Parliament senden junga meliteti yashi tembangba sülen tanü sorkari, senden junga melitetbaji Congress tai ajanga lir ta aitsüba den külemi GST Bill ji agizüktsübasa, ta shiogo.

“Ni ya nenok dang ashir, GST Bill ji agizüktsübasa. Nenoki ibaji repranga ata liang. Rajya Sabha nunga GST Bill atema onok majority lir,” ta tanü Lucknow nung osangbenertem dang Union Environment & Forest Minister Prakash Javadekar-i ashi.

Parliament senden junga melitetba atema Javadekar-i Congress aser Left Party tem nem tai tongloktsüogo.

“Parnoki (Congress) External Affairs Minister Sushma Swaraj anema ‘ballon’ tulu ka apo, saka ibaji pokrep. Parnoki Madhya Pradesh (Vyapam ken o) aser Rajasthan (Lalitgate ken o) benok, saka parnoki merangdangba nung tamakok angu,” ta pai ashi.

BJP lenirisa, tetenzük nungi Congress-i House anaprong nung timtem agütsütsü lemteter liasü, ta ashi.

Parnoki (Congress) tang tashi Lok Sabha election nung tamakok anguba magizükteter, ta paisa ashi.

“British nunger yimsüsüba ama, parnok (Congress) ket nungi kodanga tashi maotsü ta Congress-i bilem, ajisüaka parnoki state tem nung tamakok angu,” ta Union Minister Javadekar-isa shisem.

Parliament senden July 21 nü tenzüka liasü aser yashi tembangogo.

Lok Sabha aser Rajya Sabha naprongla nung senden tepiyong Congress-i anir opposition party temi Lalit Modi aser Vyapam ochimashi ken o nung densema aliba BJP lenirtem- External Affairs Minister Sushma Swaraj, Rajasthan chief minister Vasundhara Raje aser MP chief minister Shivraj Singh Chouhan menden nungi aludaktsütsü takhangba agüja senden nung mepetmesü liasü.

Tan mongpu nung takoksa tulutibaji, linük rongsenkettsüng jenjang tajungba akümtsü nükjidong nung Centre sorkari benokba Bill, Goods and Services Tax (GST) magizüktetba asütsü.