GST bill magizüktetra investment nung kongshitsü: Moody’s

New Delhi, November 25 (Agencies): Bodhbar nü Moody’s Investors Service-i, Parliament nung GST aser Land bill magizüktera ibaji ajanga investments nung mejungi kongshitsü aser India nunger company tem atema jenjang majungtsü, ta shiogo.

“Sorkar tashi nung aliba teloktep züngsemtem ajema aliba Indian Parliament Upper House (Rajya Sabha) nung tongtibang bill tem magizüktettsüa akok. Alima ainba (rongsenkettsüng) tashimeiti aliba mapang ka nung item bill agizüktsü tamakok anguba ajanga investment nung kongshitsü,” ta Moody’s tatong Tir, Vikas Halan-i ashi.

“Tawa Delhi aser Bihar na nung ama state election tem nung tamakok ngura sorkari upper house nung majority mengutettsü. Opposition party temi bill agizüktsü memelungtsü akok,” ta paisa shisem.

Goods and Services Tax (GST) atema constitution amendment bill Lok Sabha nungbo agizükogo ajisüaka Rajya Sabha nung anendaka lir aser yangi (Rajya Sabha) NDA sorkar majority mali.

Hombar nü osangbenertem den jembidang Minister of State for Finance, Jayant Sinha-i, GST Bill agizüktettsü atema sorkari opposition party lenirtem den jembidar, ta metetdakja liasü.

“Onoki parnok (opposition) den GST onük ajak jembitsü meranger. Rongsenkettsüng atema iba ya koda tongtibang, ibaji onoki rajema lir, iba yongji asükwa mongpu Parliament nung iba ya agizüktettsü atema onoki maneni o lemtepdar,” ta Sinha-i jembia liasü.