GST Bill melungtepba sülen ang senden balaka amentsü

New Delhi, August 24 (Agencies): Goods & Services Tax (GST) Bill Congress aser Left party densema yimtenren party temi ajaki melungtepba sülen ang Union sorkari Parliament senden balaka ayongzüktsü, ta ketdangsertem osang ka ajanga ashi.

GST bill ya ajanga saru inyakyim tasen ka benoktsü.

Iba asoshi sorkar ketdangsertemi Congress Tir Sonia Gandhi, tatong Tir Rahul Gandhi aser Rajya Sabha nung Opposition Lenir Sabha Ghulam Nabi Azad nunger ajuruogo, ajisüaka Rahul Gandhi-ibo, party-i akhangbatem mataloktsü tashi aser iba bill nung ozüng kar memelenshi tashi magizüktsü ta tekong meranga noktaker.

GST Bill atema telemtetba tajung ka dangi arutsü asoshi BJP lenirtem aser Finance minister Arun Jaitley, Parliamentary affairs minister M Venkaiah Naidu aser Minister of state for Parliamentary affairs Mukhtar Abbas Naqvi nungeri yimtenren party balala nungi lenirtem ajurua jembidagi.

Sorkar osang ajanga ashiba agi, party aikati GST Bill agizüktsü melunga lir saka Congress aser Left party temi parnoki akhangba nung tang tashi tekong meranga noktaker, ajisüaka Samajwadi Party aser Trinamool Congress natibo parnoki iba bill nung sorkar pusemtsü ta shiogo.

Rajya Sabha nung Samajwadi Party züngsem 15 aser TMC züngsem 12 lir, iba den Congress züngsem 68 aser BJP züngsem 44 densema NDA züngsem 63 lir. Constitution amendment bill ka agizüktettsü atema sorkari züngsem 245 aliba House nungi tajemba agi züngsem 163 bo nüngdaker.

Iba dak sentakba nung Congress aija Minister of state for Parliamentary affairs Mukhtar Abbas Naqvi-i, “Congress nung tekong meranger telok ka lir aser parnoki GST mangatetjemba ajanga makmakshimadaktsür. Taruba anogotem nung iba bill agizüktettsü,” ta ashi.

“Congress-i GST Bill agizüktsü melunga liasü, parnok iba bill ya select committee nem reprangdaktsütsüla ta akhang, aser ibaji inyakogo. Select committee-i iba osang agütsüogo. Congress-i jembiba ama inyaktsüla,” ta paisa ashi.