GST Council senden Dec 2-3 tashi atsülanger

New Delhi, November 23 (Agencies): State aikati model GST aser compensation ozüngtem nung inoksemtsü atema onük balala benokba ajanga November 25 nü GST Council senden ayonga aliba anogo atsülangogo, aser iba sendenji December 2-3 anogotem nungang amentsü.
Ajisüaka Centre aser state tem naprongla nungi Committee nung züngsemtembo November 25 nü senden ka mena draft ozüng asem — CGST, IGST aser compensation ozüngtem reprangshitsü.
NDA nübo peria maliba- Rajya Sabha nung tetsükdaktsü majurutsü atema Centre-i item ozüngtemji money bills ama benoktsü tebilemba lir.
Osang ajanga angazükba agi, draft ozüngtem nung temelenshi balala atema mapang agitsü aliba ajanga November 25 nü GST Council senden anogo atsülangtsü lemtet.
“State temi model GST ozüng nung temelenshi kar benokogo. Iba den külemi temenok agütsütsü ozüngtem nunga parnoki oren kar melenshitsü benoka lir. November 25 nü senden nung onoki draft ozüng asemji reprangshia renemtsü,” ta osang ka ajanga metetdaktsü.
Central GST (CGST) ya model GST ozüng nung ajemdaker benoktsü. IGST ozüng ajanga state tsüngda goods & services atema inyaktsü.