GST Council senden mena ano rate kar reprangshitsü

New Delhi, July 17 (Agencies): Hombar aonung video conferencing ajanga Goods and Services Tax (GST) Council ajungben senden ka amentsü, aser iba senden nung tang rongdak nüngdak rate kar reprangshitsü, ta osang ka ajanga metetdaktsü.
Iba senden ya kanga ajungbena ayongtep anungji GST Council nung züngsemtem (State balala nungi Finance Minister tem) Delhi-i arutsü tasak asünung iba senden ya video conferencing ajanga amentsü lemtet.
Union Finance Minister, Arun Jaitley-i taruba GST senden August 5 nü amentsü metetdakja liasü, ajisüaka kanga rongdak nüngdak kar adokba ajanga iba senden ayongogo, ta Central Board of Excise & Customs Chairperson, Vanaja Sarna-i osangbenertem dang metetdaktsü.
“Iba senden nung rate dak sendakba onüktem jembitsü,” ta laisa ashi.
Finance Ministry nung osang ka ajanga anagzükba agi, iba senden nung tobacco rate-a densema reprangshitsü.
Sarna-isa, “Iba senden ya amentsü sentong liasü, saka anogo melemteti liasü. Onük kar jembitsü lir. Ibaji rate dak sendakba onüktem asütsü südi,” ta metetdaktsü.