GST dak sendakba nung Cong-i benokba PM Modi-i agizüker: Rahul

New Delhi, Luchii/December 20 (Agencies): Goods and Services Tax (GST) ji “Gabbar Singh Tax” lir, ta shia tanü Congress Party Tir, Rahul Gandhi-i, par party-i GST onük nung Ato kilonser Narendra Modi aoksadaktsüogo, aser tangbo tamalen Congress-i benokba onüktem Modi-i benoka inyakner, ta ashi.
“Gabbar Singh Tax (GST) onük nung Modi mejanga aliba Congress-i saakdaktsüogo. Tang-a anünüaka tangbo pai tamalen ‘Congress Party indang tamagitsü tebilemba’ ta aitsüba tu mapa küma benoka inyakner,” ta Rahul-i twitter ajanga metetdaktsü.
Mumbai nung sentong ka nung jembidang Modi-i, sorkari osettsüset shilem 99 GST kübok saru shilem 18 mesüra iba dang tekübok latettsü nükjidong lir, ta metetdaktsüba sülen anogo ana lir Rahul-i iba o ya jembir.
Goods and Services Tax inyakyim ano temelaba akumtsü maongka lir, ta shia Mongolbarnü Ato kilonser, Modi-i, “Tanübo GST inyakyim kanga junga amenokdar aser osettsüset shilem 99 bo GST kübok saru shilem 18 mesüra iba dang nungi tekübokba akumtsü atema onoki inyakdar,” ta metetdakja liasü.
Paisa, GST saru shilem 28 agiba osettsüsettemji ishiba akumtsü, ta metetdaktsü.
Modi-i iba osang sangdongba sülen Congress-i sashia aija liasü.
Congress lenir aser taoba mapang Union finance minister, P Chidambaram-i, Centre sorkari menor sülen shisatsü angur, ta ashi.
Yashi Chidambaram-i, “Osettsüset shilem 99 bo GST kübok saru shilem 18 dang asütsü ta sorkari ashir. Menor sülen shisatsü angur. Tetenzük nungi standard rate ama saru shilemji 18 dang asütsüla liasü. GST tenzükdang menüngdak ser nung sorkari aibelen, aser tangbo parnoki metongshiner,” ta aija liasü.
Congress-isa, iba onük nung Centre-i temeli ana keter jembir aser anemsü agi inyak, aser tangbo sorkari parnok o meyipa agir tamalen parnoki atalatsüba mapa küma inyaker, ta aitsü.