GST indang State level monitoring cell senden amen

Dimapur, October 24 (TYO): October 24, 2017 nü Nagaland Chief Secretary indang Conference Hall nung GST tenzüktsü atema State level monitoring cell senden ka amen.
Senden nung Commissioner of Taxes (Officiating), Y. Mhathung Murry-i Nagaland state nung GST mapa küma inyaktsüba indang power point presentation ka ajanga sayu.
June 30, 2017 tashi nung VAT registered dealers ji 6583 züluoka liasü. August 5, 2017 tashi nung PAN shitak aliba dealers aser October 16, 2017 nung GST kübok saru agütsürtem tetsüngdaji 292 liasü aser August 2016 o 2017 tsüngda GST collection asadangbaji 2397.39 liasü, ta Y. Mhathung-i metetdaktsü.
October 4, 2017 nü state kübok tesem balala nung “The GST Dolphins” tenteta ao aser ano tanüngba tesemtem nunga iba ya tentet junger ta ajitetogo. Shishilembar aser saru agütsür ajaki GST Dolphins nungi teyari agitettsü atema iba ya tentettsüla. GST jungjunga tenzüktsü atema refresher course ka agiogo aser iba nung ketdangsertem aser staff temi aika angazükogo, ta paisa shisem.
Department of Taxes-isa saru agütsürtem den yariteptsü atema ketdangser trok nem mapa lemzüktsüogo. July 31, August 31 aser September 30, 2017 anogotem nung tasen register asürtemji 1108, 2097 aser 2705 liasü, ta Commissioner of Taxes (Officiating)-isa ashi.
Nagaland Chief Secretary aser GST tenzüktsü atema State level monitoring cell mendenbuba, Pankaj Kumar, IAS-ia o jembidang, GST teloki mapa tajung inyakba atema tenüngsang agütsü.
Nagaland nung GST mapa mezüng tenzüklibo timtem ajurur saka iba inyakyim ya tenzüka aoba sülenbo tajangzük aika angutsü, ta pai ashi.
Chief Secretary-isa register mesüi aliba Department ajaki November 15, 2017 tashi nung register asütsü mepishia metetdaktsü.