GST junga amenoktsü atema küm ka agitsü: Hasmukh Adhia

New Delhi, October (Agencies): GST kanga junga amenokogo aser small & medium business khuret pungbatsü atema saru inyakyim yanglushitsü nüngdaker, ta tanü Revenue Secretary, Hasmukh Adhia-i ashi.
Interview ka agidang pai, Goods and Services Tax (GST), koba ajanga central saru 12 aser excise duty, service tax aser VAT ama state sarutem ka dang akumer, iba ya jungjunga amenoktsü atema küm ka agitsü, ta metetdaktsü.
GST benokba sülen ita pezü jungnüa arudar, aser iba inyakyim tasen ajanga timtem aika ajurua arudar, aser item nungji ajemdaker GST Council-i temelenshi aika benoka arudar.
Medium & small businesses khuret pungbatsü atema inyakdar. GST returns ajanga aika kongshiogo.
“Temelenshi aika nüngdak. Kasa chapter nung item kar nungbo telemsa lir. Anungji item ajakji chapter sasep nung inyaktsüla, aser kongsa small & medium businesses-i ajuruba khurtettem lidir iba nungji temelenshi alitsüla. GST junga agizüktettsü atema temelenshi tapet benoktsüla,” ta pai ashi.
November 10 nü Guwahati nung Union Finance Minister, Arun Jaitley mendenbuba ser 23buba GST Council senden amentsü, aser iba dak sendakba nung Adhia-i, “GST Council-i rationalisation atema ita ka inyaktsü, iba sülen onoki Guwahati nung tekaratiba nung langka tasen benoktsü,” ta ashi.
“Onoki ibaji tekaratiba nung inyakner, ajisüaka ibaji committee-i mapang kobika agitsü, iba dakji keta lir. Parnoki data nüngdaktsü aser saru nung takoksa anguba ongko inyaktsü. Parnoki medemdanga asadangtsü atema aika nüngdaktsü. Ajungaji reprangshitsüla,” ta paisa ashi.
GST inyakyim jungjunga bentettsü atema mapang kobika agitsü, ta asüngdangba langzüdang Adhia-i, “Iba atemaji küm ka agitsü. Kechiyong iba inyakyim ya ajak asoshi inyakyim tasen ka lir,” ta ashi.
“VAT benokdang küm ka tashi iba anema nokdak. Nisungtemi VAT ji kechi’ar memeteti liasü, aser tang iba (GST) anema tesashiba nokdaka liasü,” ta paisa shisem.