GST kübok shisaliok jenjang tasak masütsü: Sorkar

New Delhi, July 07 (Agencies): Goods and Services Tax kübok shisaliok jenjang tasak asütsü ta jembiba osangji tai, ta metetdakja tanü Centre sorkari, GST kübok shisaliok rejutemi kaketshirtem, tesayurtem aser staff tem nem service balala agütsüba nung saru magitsü, ta metetdaktsü.
“GST kübok shisaliok jenjang tasak asütsü ta jembiba osangji khenyongi tamendakdak maka. GST dak sendakba nung shisaliok nung temelenshi kecha mali, ajisüaka school yangkhu ama items kar nung saru ajemogo,” ta tanü Finance Ministry-i sangdong ka ajanga metetdaktsü.
Pre-school education nungi higher secondary school aser vocational education courses tem GST küboki maiter.
Ajisüaka nijatemi shisaliok rejutem nem transport aser canteen service agütsüba tem atema sarua agia liasü aser maneni GST küboka kasa saruji agitsü.
“Centre sorkar, state sorkar mesüra union territory temi sponser asüba mid-day meals scheme-a GST küboki maiter,” ta sangdong nungsa shia lir.
“Anosa shisaliok rejutem nung security mesüra housekeeping services atema GST magitsü. Higher secondary tashi nung admission aser tatidang ketdangsüa agiba institutions-a GST küboki maiter,” ta Finance Ministry-isa ashi.
Maneni register süa aliba charity temi tsürabur malir tanurtem, talidak ki malirtem, lajartem, matamabensartem, tepoukdak alirtem aser yimtsüngtem nung teintet rogotem atema shisaliok sentongtem balala katsüba mesüra skill development atema inyakba GST küboki maittsü, ta ministry-isa metetdaktsü.