GST onüktem reprangshitsü asoshi Arun Jaitley-i shishilembartem ajuru

New Delhi, September 28 (Agencies): Brihostibarnü Union Finance Minister, Arun Jaitley-i shishilembartem aser exporter nungi züngsemtem ajurua Goods and Services Tax (GST) kübok parnoki timtem balala ajangshiba asüngdanga o lemtepa liasü.
Finance Ministry osang ka ajanga, “Minister-i shishilembartem aser exporters tentet balala nungi züngsemtem den senden amen. Iba senden ayongzükba nükjidongji GST benokba ajanga timtem ajangshiba lemsateptsü atema liasü,” ta metetdaktsü.
Goods and Services Tax Network (GSTN) Chairman, Ajay Bhushan Pandey aser company nungi tanga ketdangsertemi GST indang I-T framework repranger, aser tanü iba senden nung parnoka densema liasü.
Jaitley-isa GST Suvidha Providers densema GST benokba nung stakeholders-a ajurua liasü, ta ministry-i twitter ajanga metetdaktsü.
“Stakeholders, talisa Micro, Small & Medium Enterprises khuret pungbatsü atema aser GST junga benoka inyaktettsü atema pai tebilemba onüktem meshia liasü,” ta Finance Ministry-isa metetdaktsü.