GU-i Tasile N. Zeliang nem Degree agütsüogo

Dimapur, April 29 (TYO): Gauhati University-i Nagaland nungi Tasile N. Zeliang nem Doctor of Philosophy Honoris Causa degree agütsüogo.
Tasile N. Zeliang-i Nagaland nung education, sports aser social service nung shilem tulu agia mapa inyakba ajiteta Gauhati University-i la nem hononary degree agütsü.
La indang ‘Scroll of Honour’ nung, “Nagaland kübok Peren nungi Tasile N. Zeliang ya nüjiso atema rarar ka jala lir. Lai tesayur ka ama la taküm bendanga agüja tenzük aser lar oshi nung kaket aika züluogo. Lai sempet aika agizükogo aser item rongnung Ojoswani Yuwak Alankar (2011), New Art Payer Award (2015) aser The Best Citizens of India Award (2017) tem dena lir” ta zülua lir.
Gauhati University 26 buba Convocation nung Assam Angh aser Gauhati University Chancellor, Banwarilal Purohit-i Tasile nem Degree agütsü.
Nagaland nungi Tasile N. Zeliang aser Arunachal Pradesh nungi Nabam Tata nati Doctor of Philosophy Honoris Causa degree tem anguba atema Nagaland aser Arunachal Pradesh, Angh, P.B Acharya-i tena nem tenüngsang agütsü.
Loktiliba aser linük asoshi mapa tajung inyakertemji University temi ajiteta tenüngsang agütsütsüla, ta Angh-isa metetdaktsüogo.
Iba ama degree agütsüba ajanga kijatemi tali nendaka mapa inyaktsü aser ibaji ajanga sobaliba wazüka ayutsü, tzü-mopung kümzüka ayutsü, loktiliba nung azükaru alitsü aser tetsür-tebur tashi aittsü, ta paisa shisem.
P.B. Acharya ya taoba mapang Assam Angh aser Gauhati University nung Chancellor inyak aser pai Tasile N. Zeliang-i education, sports aser social service dak sendakba mapa tajung inyakba ajiteta, la nem degree agütsütsü atema tenüng benoka liasü.