Gubbi nung Abiogenesis Theatre Group-i shilem agi

Aenjeti/January 29, 2019: Gubbi, Karnataka nung Aenjeti 27, 2019 nü Dr. Gubbi Veeranna Trust, Karnataka-i ayongzükba GVITA National Theatre Festival sentong nung Abiogenesis Theatre Group-i shilem agidang tangokba noksa ka angur. 

Dimapur, Aenjeti/January 29 (TYO): Gubbi, Karnataka nung Aenjeti/Jan. 27, 2019 nü GVITA National Theatre Festival sentong nung Abiogenesis Theatre Group-i ‘Putu and His Tiger Spirit’ ta nüngja agütsür howey musical drama ka sayaa liasü.
Iba drama ya akhi putu indang imdangjem ka lir, koba Playwright/Director Arenla Subong-i musical yimya nung zülua lai introduce süogo. Drama nung ken/jembishinü ji English oshi nung aser kenji Naga nunger sobaliba kensü nung aten.
‘Putu and His Tiger Spirit’ nung Putu ya keyi tanüla aketba nisung ka alir. Kenü anogo par (Putu) lu nung züsentetba aonsotsütem aueri auyaba osang tebutsü ajanga angazükba mapang pa kanga mepelai kümadok. Idangjisa pai auerji aputsü atema ayamesoa alu jagi aoer. Iba mapang tetsür auer ka aser la tetong nati Putupa aser la kingungtsü na ajurur. Apuani ana tsüngda mapang shia ajurutepdang ashishitepba tebang agi raratepba tem indang iba drama nung sayur. GVITA National Theatre Festival nung Abiogenisis-i shilem agiba kisüng ya dang masü saka Naga nunger sobaliba sobutsü semer akhi tetsü tebou ken tena iba drama sayaba ajanga telok süngmangdakja liasü.
Iba drama nung, Arenla Subong-i Jemti shilem agia liasü, kasa mapang Moa Subong-i Putu; V. Hotovi-i Akato; Limatula Longkumer-i Amakla aser Lipokmeren-i Sendong aser keyi tanüla (Tiger Spirit) shilem agiogo. Technicians maparen nung Lipokmeren aser Kibulong Imsong nati achaayanga liasü.
Iba Festival sentong ya Dr. Gubbi Veeranna Trust, Karnataka-i ayongzük aser Sangeet Natak Akademi, Ministry of Culture, Government of India-i sponsor süa liasü.