Gujarat atema Congress manifesto sayaogo

New Delhi, December 04 (Agencies): Hombarnü Congress Party-i Gujarat assembly elections atema party manifesto sayaogo; iba manifesto nung Congress-i aluyimertem atema tongtibangsüa rangloker inyaktsü ta nangzüka lir.
Congress-i manifesto nung aluyimertem dang parnoki apua aliba sentsüh atoktsü aser aluyimertem alu nung tzü antsü asoshi anogoshia electricity ghonda 16 agütsütsü ta nangzüka lir.
Manifesto nung party tenangzükbatem rongnung: lanur lakh 26 nem mapa agütsütsü atema sen crore 32,000 lemzüktsütsü aser mapa mengui alir lanurtem nem allowance sen 4,000 agütsütsü; sorkar mapa nung contract system anentsütsü aser contract mapa inyakertem regularize sütsütsü; tetsürtem anema aibelenba ken otem nung obendang tekaraba nung agütsütsü asoshi Fast-track courts amenoktsü; college azünger kaketshirtem nem laptops aser smartphones agütsütsü; state nung Petrol aser Deisel totzü liter nung sen 10 ajema kümdaktsütsü; Patidar nüburtem nem shisaliok aser sorkar mapa nung kasa temeten agütsütsü aser SC, ST den OBC nüburtem nem reservation agüja alibaji magientsü densema lir.
Gujarat nung December 9 aser December 14 nü assembly election agitsü aser December 18 nü vote zünga election osang sangdongtsü.