Gujarat ATS-i ISIS sentong raksatsü

Rajkot, February 26 (Agencies): Deobarnü Gujarat Anti Terrorist Squad (ATS)-i adianu ana apuba ajanga ISIS-i tamangba tesem ka amaktsü aliba sentong raksatsüogo.
ATS team-i Rajkot aser Bhavnagar na nungi Wasim Ramodia aser Naem Ramodia na apu, aser tena ket nungi bomb yanglutsü kakettem, gun powder gram 90, mobile phones aser Jihadi kakettem puogo.
Rajkot nung osangbenertem den jembidang Crime Branch Joint CP, IK Bhatt-i, tenati tamangba tesemtem amaktsü sentong liasü, ta metetdaktsü.
“Parnoki tamangba tesem ka amaktsü sentong liasü, onoki osang angazükba sülen mita aodang tena apu,” ta pai ashi.
Tena apuba ya takok tulu ka lir, kechiyong tang mezüng state nung kiralongra inyaktsü sentong alir nisung ana apuba ya ajanga state nung ISIS telok indang network ali asü maliar jangjatsü.
Ano külen Libya linük nungi ISIS ket nungi kümzüka India linüki anir arusang India nunger doctor, K Ramamurthy-i, kiralongrar telok IS-i India nung shisaliok aser rongsenkettsüng nung tenük yokdar, ta metetdaktsü.
February 14 nü pa Islamic State ket nungi kümzük aser pai osangbenertem dang, IS züngsemtemji zünga shia meteta alir lanurtem lir, aser India indang ajak meteta lir, ta ashi.