Gujarat BJP Tir atema Vaghani shimogo

Ahmedabad, August 10 (Agencies): Gujarat BJP-i Bodhbarnü Bhavnagar West constituency MLA aser Patel kin nungi leir, Jitu Vaghani state unit Tir shimogo, kechiyong tawa BJP Tir, Vijay Rupani Chief Minister menden atema shima liasü.
“State BJP Tir atema Jitu Vaghani shimogo,” ta party otongdar, Harshad Patel-i metetdaktsü.
Arishi küm 46 Vaghani ya Patel kin rongnung tongtibang nisung ka lir, aser tamalena pa state youth wing Tir aser party state unit secretary inyaka liasü.
Vaghani ya Leuva Patel kin nungi lir.
Pa shimtsü atema tanü party National Tir, Amit Shah-i agizükba sülen Central party lenirtemi state unit nem iba osang metetdakja liasü.
Vaghani-i mezüng 2012 küm election nung takok ngua liasü. 2007 küm nunga pai election nung toktep saka Congress candidate, Shaktisinh Gohil matsüngdang tamakok angu.
BJP-i Patel kin nungi masüba lenir, Vijay Rupani state party Tir shima liasü ajisüaka pa chief minister akümba den külemi assembly election ana nung aliba ajanga Patel kin nungi Vaghani shim ama reprangteter.
Ano külen tang tasen shimba Deputy Chief minister, Nitin Patel-a Patel sub-caste, Kadva nungi lir.
Yaküm nungi tenzüka Patel kini sorkar mapa aser shisaliok reju balala nung parnok nem menden wazüka yutsütsü takhangba agutsüba mapang ka nung state BJP Tir atema Patel kin nungi Vaghani shimogo.