Gujarat CM Anandiben Patel-i sodi meshiogo; Punjab Angh shimtsüa akok

Ahmedabad, August 10 (Agencies): Gujarat nung Patel kin longkak aitba mapang aser tawa Dalit nunger longkak aitba mapang Gujarat Chief Minister, Anandiben Patel-i junga mazüoktet ta la aitsüba mapang Hombarnü lai, la arishi küm nung kanga tain akümba kuli nung ajemdaker CM menden nungi sodi meshiogo.
Anandiben-i iba osang ya mezüng la indang Facebook post nung sangdonga lai, la arishi küm 75 majungdang anisüngzükner, ta ashi.
Arishi küm 75 ya Ato kilonser, Narendra Modi’er cabinet minister tem atema arishi telatet lir, aser la taküm November ita nung küm 75 abensatsü.
Anandiben-i sodi meshiba sülen mapang tatsüka tsüngda BJP Tir, Amit Shah-i, la sodi meshiba shidiji party Parliamentary Board nem agütsüogo, ta metetdaktsü.
BJP party osang ka ajanga ashiba agi, la nem Punjab Angh menden agütsütsüa akok.
Facebook nung Gujarati oshi agi lai, Chief minister inyaktsü maongka agütsüba atema lai BJP bangdak lenirtem dang pelaba lemsatep.
Facebook page nung Anandiben-i, “Tesüiba küm 30 tashi ni BJP nung nendaka inyakogo. Mahila Morcha nungi Chief Minister menden tashi ajungketba atema BJP lenirtem dang ni sentsüh lir. Tesüiba küm 18 tashi ni sorkar tongtibang department balala nung tongti inyaka liasü. November ita nung ni arishi küm 75 abensatsü. Kanga tongtibang Vibrant Gujarat Summit January 2017 nung akatsü aser küm tatemlen elections agitsü lir. Item tongti sentong ana atema lenir taseni (Chief minister) ayongzüka sentong asameyangtsü junger. Ita ana tejaklen ni anisüngzüktsü atema asüngdang,”  ta ashi.
“Gujarat nübur tenzüktsü atema ni tajungtiba agi inyakogo. Küm aika BJP-i kü nem khuret agütsüba atema BJP dang pelar,” ta lai ashi.
BJP lenirtemi ashiba agi, CM menden atsüngtsü atema temaba jenjang nung state BJP Tir, Vijay Rupani lir aser tanü nikongdang Patel ajuruogo. Ano Vija sülen CM menden atema temsüa alirtemji ministers- Saurabh Patel aser Nitin Patel na lir.
Anandiben  ya 1998 küm nungi BJP sorkar nung minister inyaker aser 2014 nungi Chief Minister inyaker aser la yimsüsüba kübok tayongzükba tensa jenti ajangshiogo.
Iba osang angazüka Delhi Chief Minister, Arvind Kejriwal-i twitter ajanga, “Nai sodi meshibaji Gujarat nung AAP nüngtugu akümba ajanga lir. BJP-i Gujarat nung (takok angutsü) temulung lemteta mali,” ta ashi.