Gujarat nung BJP-i EC dang nungi teyari agir: Congress

New Delhi, October 13 (Agencies): Yashi Election Commission-i election anogo sangdongdang Himachal Pradesh assembly election agitsü anogobo sangdong saka Gujarat assembly election agitsü anogobo mesangdongba dak sendakba nung tanü Congress-i, BJP tetuyuba nung ajemdaker Election Commission-i iba telemtetba agi, ta aitsü.
Tanü AICC otongdar, Abhishek Singhvi-i, “Gujarat nung party jenjang majungba atema BJP-i election commission teyari bushibaji temeimtsüka lir. BJP-i election commission ya election omission kümdaktsüdar,” ta aitsü.
Congress-i ashiba agi, Gujarat nung election agitsü atema anogo mesangdongbaji Ato kilonser, Modi state-i oa sangdong kar agütsüdaktsütsü atema melaba lir.
Singhvi-isa, “2002 küm Gujarat nung rara adokba ajanga state ana nung election külemi magitetba dangashi, teti agia state ana nungji election külemi agia arur,” ta ashi.
Shidakba agibo, yashi EC-i Himachal Pradesh aser Gujarat naprong atema election agitsü anogo sangdongtsüla saka Gujarat election anogobo mesangdongi December 18 matongdang agitsü ta dang metetdakja liasü.
Yashi Chief Election Commissioner, Achal Kumar Jyoti-i, Himachal Pradesh Assembly election November 9, 2017 nü agitsü aser December 18, 2017 nü vote azüngtsü, saka Gujarat election agitsü anogobo memetetdaktsüi liasü.