Gujarat nung general category 10% mapa küma inyaker

New Delhi, January 14 (Agencies): Tawa Parliament nung general category kübok sensakertem atema sorkar mapa aser shisaliok rejutem nung shilem 10 wazüka yutsütsü atema agizükba sülen linük nung Gujarat state nung tama reservation mapatong mapa küma tenzükogo.
Tanü Gujarat nung BJP-i aniba sorkari general category kübok economically weaker sections (EWS) atema state sorkar mapa aser shisaliok nung menden shilem 10 wazüka yutsütsütsü atema maparen tenzükogo, aser ibaji ajanga liünk nung iba mapatong tenzükba mezüngbuba state ji Gujarat asutsü.
General category kübok sensakertem asoshi shilem 10 wazüka yutsütsü atema taoba hopta Parliament-i agizükba sülen Honibarnü linük Tir, Ram Nath Kovind-ia agizükogo.
Yashi Gujarat Chief Minister, Vijay Rupani-i, January 14, 2019 nungi tenzüka par sorkari reservation mapatong tenzüka inyaktsü, ta metetdakja liasü.
“Gujarat sorkari 10% EWS reservation January 14, 2019 nungi mapa küma inyaktsü lemtetogo. Iba ya recruitment ajak nung benoka inyaktsü,” ta pai twitter osang ajanga metetdaktsü.
General category nung sensakertem nem sorkar mapa aser shisaliok nung shilem 10 wazüka yutsütsü atema January 7, 2019 nü Centre sorkari agizüka liasü.
Nisung ka meyong senotsü aser kiojen nung ajemdaker reservation agutsütsü.
Reservation tajangzük angutsü atema annual income ji sen lakh 8 kübok asütsüla, aluyimba li hectare 5 dang tekübok asutsüla, parnok kiji 1,000 sq. ft den ishiba asutsüla, iba dak alia telatetba kar densema lir.