Gujarat nung tzünglu dak sentakba lendong nung nisung 25 süogo

Palanpur/Bhuj, July 29 (Agencies): Tzünglu kanga tali aruba ajanga North Gujarat nung aliba district pezü kanga mejungi kongshia tzünglu dak sentakba lendong balala nung tajemba agi nisung 27 tashi süogo.

Tzünglu maneni aruba ajanga Banaskantha district tamajungba kongshi, iba den külemi Rajasthan den arrtsülen aliba jilatema aika mejungi kongshiogo.

“Tang tashi nung nisung ti süogo (district nung). Kankrej nung nisung ana asüba osang lir aser Vav, Tharad, Suigam, Dhanera, Bhabhar aser Lakhani jilatem shia nung nisung kaka süogo,” ta Banaskantha district collector Dilip Rana-i osangbenertem dang ashi.

Tanüngba asürtemji Bhuj, Rapar, Patan, Surat, Navsari, Himmatnagar, Chotila aser Ahmedabad nungi liasü.

National Disaster Response Force (NDRF) team aika Suigam, Tharad, Lakhani aser Dhanera kilatemi yokogo aser district nung nisung 1,000 jungnüa tesem nungi ainshidaktsüogo. Iba den külemi light indong 1005 laoba ajanga yimtsüng 400 shi nung light mali, ta ketdangsertemi ashi.

State MED ajanga ano maneni Brihostibar nü tashi tzünglu arutsü ta metetdakja lir.