Gujarat nung tzünglu tali aruba ajanga nisung 11 asü

Ahmedabad , July 28 : Tanü Ahmedabad nung tzünglu kanga sashia aruba ajanga senzüsemponger mesademi senzüba yangi noksa nung angur. 

Ahmedabad, July 28(Agencies) : Gujarat nung tanen maka tzünglu aruba ajanga nisung 11 süogo aser angopur tem danga kanga kümdangaa senzütsü temetettsü MeT Department-i tanü metetdaktsüogo.
Yashi nungi tzünglu kanga sashia aluba ajanga tzümetsüng nungi kümzüktsü atema terenemshiba alitsü atema National Disaster Response Force (NDRF) aser State Reserve Police (SRP) North Gujarat,. Banaskantha tesemi yokogo.
Disaster Control Room aser police osanga ajanga ashiba agi tzünglu tesashi aluba ajanga Banaskantha district nungi nisung 4, Sabarkantha district nungi nisung ka aser Rajkot o Patan district tem nungi nisung asem-sem asüba ajak senteper nisung 11 tashi süogo.
Iba lendong nung asürtem rongnungji nisung asembo süngdong kokzüka alua gari toudak nung tsükdang yangji asü ta police osang ajanga metetdaktsü.