Gujarat rara mapang Vajpayee-i ashiba o Modi-i manga: Congress

New Delhi, November 02 (Agencies): Hombar nü Ato kilonser Narendra Modi-i 1984 küm Sikh nunger anema raraba onük nung Congress aija jembiba sülen Congress-ia iba oji meyipja, “1984 küm Sikh nunger rara mapang Congress-i Indian army Delhi-i jaoka liasü, ajisüaka 2002 küm Gujarat rara mapang nung Modi kübok Gujarat sorkaribo ola madoki toktsü,” ta aitsüogo.

Bihar nung Modi-i jembiba sülen kasa anogo nungsa Delhi nung osangbenertem senden ka nung jembidang Congress otongdar, Anand Sharma-i, Gujarat rara mapang army tem mejaok aser rara adoktsüsa Modi aser par nisungtemi ajak inyak, ta aitsü.

“2002 küm Guijarat rara mapang BJP sorkari par party nungisa Ato kilonser Atal Bihari Vajpayee-i tuyuba o manga. Pai (Modi) tangar maitsüdang pa tama meyipa reprangdangtsüla,” ta Sharma-i ashi.

Sharma-isa, Ato kilonser aser par minister temi parnok tangatetba ka mesüra, tangar tangatetba manger. “Tongti minister temi shisashirtem aser artist tem aitsür aser merenshir,” ta ashi.

Congress lenirisa, tang linük tensa onük nung Moody’s-ia Ato kilonser dang tekümdangtsü o shiogo, ta ashi.

“2015 küm linük mepetmesü atema tebilemtsü kaa lira Ato kilonseri ajak nem telangzüba agütsütsüla. Küm 31 tashi tejen onük ka bener aruba ajanga pai Temzüng kübok pa teinyaktsü mapa nungi mejenbutsü,” ta Congress lenirisa shisem.