Gujurat nung PUBG Mobile game asayar 16 apu

Rajkot, March 15 (Agencies): Gujurat nung Player Unknown’s Battlegrounds (PUBG) game asayaba atema police-i kaketshir 16 tashi apu.
Gujarat kübok Rajkot yimti nung iba game noktangba sülen hopta ka lir taoba Bodbarnü police-i PUBG smartphone game asayar kaketshir 10 apu. Ajisüaka, parnok ajak bail nung chiokogo ta osang ajanga ashi.
Maneni, Brihostibar anepdang arishi küm 18 aser 22 tsüngda kaketshir 6 tashi police-i iba game asayadang apu aser parnoka bail nung chiokogo.
PUBG asayaba ajanga yimyatsüya, inyaksangshi aser o jembiba nung kongshir ta shia Gujurat kübok Rajkot ketdangsertemi iba game noktang.
Rajkot nung Police Commissioner Manoj Agrawal-i March 6 nü iba game nokdangba ozüng metetdaktsü.
PUBG Mobile noktangba ya bailable offence kübok lir aser iba den ‘Momo Challenge’ dena lir.
India kübok Goa state nung Minister kati PUBG ya ‘kibong shia mojing ka” ta atishia jembiogo. Taoba ita tu Prime Minister Narendra Modi den sensaksemdang tanur tetsü kati lar jabaso online games kanga sapua asaya tebilemtsü lemsatep.