Gulberg Society ken o: Nisung 11 taküm piyong tepoukdak ayutsü

Ahmedabad, June 17, 2016 : Gulberg Society ken o nung aija alirtem tatemsabuba obendang atema Hokolbarnü Ahmedabad nung aliba court kati anir aruba noksa angur. Tanü Court-i aija alir nisung 11 takum piyong tepoukdak ayutsü, aija alir ka küm 10 tepoukdak ayutsü aser aija alir nisung 12 küm 7 tepoukdak ayutsü obendang agütsüogo.

 Ahmedabad, June 17 (Agencies): Gulberg nung nisung tepsetbaji tangatetba aliba lokti puti otsü nung ‘anogo tanaktiba’ asütsü, ta shia tanü Ahmedabad nung aliba special SIT court kati iba ken o nung aija alir nisung 11 taküm tepiyong tepoukdak ayutsü obendang agütsüogo.

2002 küm Gujarat rara sülen Gulberg nung taoba mapang Congress MP, Eshan Jafri densema nisung 69 mi agi rongseta südaktsü.

Iba ken o nung aitsürtem ajak nem tasüba temerenshi agütsütsü takhangba magizüki court-i, temerenshi obendang reprangshitsü atema linüki tashi mamshira nisung 11 prongji masü tashi tepoukdak ayutsü, ta ashi.

Kasa ken o nung aibelen tera tajemba nung aija alir nisung 13 rongnungi nisung ka küm 10 tepoukdak ayutsü aser nisung 12 küm 7 tepoukdak ayutsü obendang agütsü. Prosecution-ibo aija alir parnok 24 prong nem tasüba temerenshi agütsütsü atema benoka liasü.

Iba tatalokba sülen tai tonglokja alir shilem 90 bo bail nung chiok, ajisüaka takoksa ajururtemi parnok anema ken o kecha magütsü, iba den külemi bail nung chioka aliba mapang parnoki ozüng alema aibelen mapa meinyak, anungji parnok nem tasüba temerenshi agütsütsü metemsü, ta obendangeri ashi.

Gulberg Society tatalokba ya Narendra Modi Gujarat Chief minister inyakba mapang February 28, 2002 nü ataloka liasü. Iba anogo nung lokti nisung 400 shii Ahmedabad yimti tiyong nung aliba Gulberg Spociety kidang mi senokja nisung jenti tepset.

Iba ken o kayonga arudang kuliser nisung 338 indang o angadanga liasü, aser obendanger pezü tashii leniba nung iba ken o kayonga aru.