Gulf businessman ka nem London award agütsütsü

London, December 06 (Agencies): London nung aliba Asian Lite osangkaketi Jeddah nung alisang, Shifa Al Jazeera Medical Group nung managing directorn NRI businessman K.T. Mohammed Rabeeh Rabeeulla nem ‘Person of the year’ award agütsütsü metetdaktsüogo.
Iba award agütsütsü shimtetba nung tetendangertemji, India Club UK chairman Ashit Sinha, Europe Tatar Hoho nung züngsem Afzal Khan, taoba mapang Manchester tekolakba Naeem Ul Hassan nunger liasü aser parnoki ashiba agi, Rabeeullah-i business nung linertem dang lokti yaritsü asoshi tatishitsü tajung sayur.
“Dr. Rabeeullah-i Thailand nung tepetzük tia nung alirtem nem teyari agütsüba mapaji tenüngsang agütsü dalang,” ta parnoki sangdong ka ajanga ashi.
Iba award ya April 23, 2016 nü London nung sentong ka agia agütsütsü.
Rabeeullah-i par company ajanga aatetba sen nungi noklang nung shilem pongu agüja Kerala nung insurance sentong aser kaketrejutem atema bus gari agütsütsü. Tractor aser farm nung amshiba osettsüset alitsü atema pai Thailand nung aliba yimtaklirtem nema sen dollar 100,000 tenla agütsüogo.
2013 küma pai ‘Pravasi Bharatiya Award’ ngua liasü. Iba ya India nung bendanger tushiba rongnung tematiba award lir.
Shifa Al Jazeera Medical Group ya Middle East nung temang anepalur nija telok ka lir. Parnok indang tenük anepaluba dokan aika, pharmacies, clinics, aser mozü ki aika GCC aser India linük tem nung lir.