Gulf-i kiralongrar anema rarabaren pela agizüker: Kerry

Washington, April 29 (Agencies): Middle East nung tentetba linüktemi kiralongrar talisa, Islamic State (IS) telok anema raraba atema pelaba olen ka US Secretary of State, John Kerry-i tanü, Hokolbar nü metetdaktsüogo.
“Gulf lima nung tentetba Arab linüktemi kiralongrar anema rara Middle East ajunga nung yimtenren aser rongsenren tensa tajung bener arutsütsü merangba atema kanga pelar,” ta pai sangoktsü.
IS telok anema raraba tongpang nung US-i aniba alima teloktep mitkar telok nung alima linük 66 nungi mitkaremi shilem agia lir aser item linüktem rong nung Middle East linüktema densemba osang jangjaogo.
“Alima teloktep mitkartemi Iraq aser Syria mitkartem yaria, IS telok anema tongpang raratsü tenzükba sülen tanü tashi nung IS teloki tashiyim agi agiba lushi noklang nung shilem 44 Iraq nung aser Syria nung lushi shilem 17 shi IS ket nungi tanaben agishiba osang bushiteta lir,” ta Kerry-i metetdaktsü.
Paisa ashiba agi, US-i aniba alima teloktep mitkartemi IS madak maneni takok ngua raratsü nükjidong nung senotsü lenmang nokdangba, lanurtem IS telok nung mezüngsemdaktsütsü merangba aser IS teloki tentetba social media ajunga shibangtsütsü merangba densema, tasa aser sentong balala inyaktsü tenzüka lir.
“IS telok madak takok ngua raratsüren nung mapatong aser mera karbo Middle East nung tentetba lenirtemi dang agitsüsa akümer,” ta shia, Gulf nung tentetba linük lenirtemi maneni nungdakba mera agia IS samatsütsü merangtsü tajungshiba olen ka Kerry-isa lemsatepa liasü.