Gulf State & BRICs-i Syria nunger refugee atema tali inyaktsüla: US

Washington, November 07 (Agencies): Saudi Arabia aser Qatar na densema, Arab lima tentetba rongsen jenti akaba Gulf yimlitem aser Brazil, Russia, India, China aser South Africa nunger densemba BRICs linüktemi Syria nunger refugee nisungtem atema tang dang nungi tali inyaktsüla ta tongti United States ketdangser kati tanü Honibar nü metetdaktsüogo.
“Middle East nung tentetba Gulf yimlitem ya Jordan aser Lebanon na den aser BRICs linüktema South Africa linük den takarba lir. Anungji, item linüktemi refugee nisungtem indang taküm jenjang tajungba kümdaktsütsü asoshi tang inyakba den tali inyaktsü nungdaker,” ta US Assistant Secretary of State, Anne Richard-i tanü ashi.
2011 küm nungi tenzüka Syria Tir, Bashar al-Assad-i aniba Syria sorkar anemtsü tenzüka Syria nung 4 tashi tongpang kanga sashia raraba ajanga tanü tashi nung nübur ishiba agi nisung 250,000 shi asüba aser nisung million 4 shi pei linük toktsür bendanglen refugee ama jenoka aliba osang bushiteta lir.
Syria nunger refugee nisung timbaka kidangsüa aliba Turkey, Jordan aser Lebanon nunger nung jenoka lir saka par refugee nisung meyirijang aikati Europe nung jenoka alitsü asoshi ayamesoba osanga bushiteta lir.
Anne-i ashiba agi, Kuwait aser United Arab Emirates (UAE) na densemba Gulf Arab linüktemi refugee nisungtem indang taküm jenjang tajungba kümdaktsütsü asoshi nungdakba maparen bendanga agüja inyakogo saka Saudi aser Qatar na densema tanüngba Arab linüktemi tang dang nungi tali inyaktsüla.
Ano, World War II (WWII) tongpang raraba sülen refugee nisungtem atema renemba United Nations (UN) convention on refugee nung Saudi Arabia, Oman, UAE, Kuwait, Bahrain aser Qatar nunger züngsemba Gulf Cooperation Council (GCC) linük 6 prongla züngsema maliba osang bushiteta lir.