Guns N’ Roses teloki 2017 tashi tour jajatsü

July 29, 2016  : Nüngtugu ken ‘Welcome to the Jungle’ atener telok nung manager-i, kentener Axl Rose, guitar atemer Slash aser bass guitar atemer Duff Mckagan nunger aliba telok sangküm, 2017 küm, tashi tour jajatsü sentong lir, ta ashi.
Pai, “Parnok tour jajaba tembangtsü anogo mejangjateter. Sangküm, 2017 nunga anogo aika nung parnok kenten sentong akatsü anogo meka-a lir. Tang ya parnok ajak lungjemer nükjidong ka atema inyaker,” ta Atlanta TV sentong ‘WXIA’ nung ashi.
Parnok tanaben lungjemer kenten sentong akadang tatalokba aika atalokdar.
Taoba hopta Guns N’ Roses teloki New Jersey nung aliba MetLife Stadium nung kenten sentong akadang police ketdangser ka dak azükba ajanga tetsür ka dena parnok nisung aika police-i puer ao.
New Jersey State Police-i, iba aonung police dak teka sangshiba atema arishi küm 30 tain, Kimberly Goodman, tangar mapa tamajung inyakdaktsütsü ajungshiba atema parnok nisung 11, yimya tamajung benshiba atema nisung 9 aser ozüng alema benshiba atema nisung 3 apu, ta New Jersey 101.5 dang ashi.
Sangküm UK nung akatsü aliba Glastonbury music festival nung Guns N’ Roses teloki otsüsütsüsa shilem agitsü ajaki kanga yongyaseta atar.
Sangküm mei mapang akatsü aliba kenten benjung nung tanaben lungjemer aliba, Guns N’ Roses aser The Stone Roses teloktemi shilem tajung agitsü ajaki yongya-a atar.