Güntok 7 dena Kaziranga nung shiruru 90 dak tema süogo

Kaziranga, August 1 (Agencies): Assam Kaziranga National Park tzü agi metsüngbangba ajanga güntok tenet dena shiruru 90 dak tema süogo, ta sorkari Parliament nung tanü metetdaktsü. Tzümetsüng nung güntok tenet, aser mesü 85 süogo , ta Environment Minister Harsh Vardhan-i tezüluba nung telangzüba agütsü.
Assam nung tzümetsüng lendong nung nisung 70 dak tema süogo aser district 29 nung nisung lakh 25 dak tema iba lendong agi kongshir kangshidar. Ketdangsertemi relief camp aser distribution centre 1,098 lapoka lir. Vardhan-i ashiba agi, tiger reserves ajanga Annual Plan yanglur agütsüba dak ajemdaker sorkari onok nem central scheme ‘Project Tiger’ nungi National Tiger Conservation Authority ajanga fund agütsür.
Item fund tem ya maparen balala nung amshir. Tzümetsüng dak sendakba nung highland tem yangluba, anentsüh nungi ki o jen tem anenzüka modaktsüi kümzüka ayutsü atema yanglushiba, shiruru kümzüktsü asoshi rong aliba aser lenmang balala yangluba nung iba fund amshir, ta paisa ashi.